18 марти соли 2025 дар Маркази ҷумҳуриявии таълимию методӣ, ба муносибати ҷашни байналмилалии Наврӯз чорабинӣ бо шукуҳу шаҳомати хоса баргузор гардид.
Чорабинии идонаро директори Марказ Шавкат Каримзода оғоз бахшида, ба ҳамаи иштирокчиёни чорабини сиҳатию саломатӣ, хотирҷамъӣ ва муваффақияту сарбаландӣ таманно намуданд.
Дар идома қайд карда шуд, ки ҷашни Наврӯзи байналмилалӣ яке аз маросимҳои суннатии мардуми тоҷик ба ҳисоб рафта, бо сифатҳои башардӯстонааш аз ҷониби ҷомеаи ҷаҳонӣ ҳамчун дастоварди беназири фарҳанги умумиинсонӣ пазируфта шудааст.
Пазируфта шудани Наврӯз ба ҳайси ҷашни байналмилалӣ ва ворид кардани он ба Феҳристи осори фарҳанги ғайримоддии умумиҷаҳонии созмони ЮНЕСКО яке аз дастовардҳои арзишманд натиҷаи азму талоши чандинсолаи Тоҷикистон таҳти роҳбарии Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон мебошад.
Дар идома гуфта шуд, ки ин ҷашн рамзи ормонҳои нав ва умедҳои тоза барои тамоми инсонҳо мебошад, ки дар он табиат бо тамоми зебоияш эҳё мешавад, ривоятҳои фарҳангӣ ва суннатҳо зинда мешаванд ва мардуми ҷаҳон бо якдигар муҳаббат ва ҳамдардӣ худро ба намоиш мегузоранд. наврӯз маросими бузурги таҳаввул ва шодиву хурсандӣ аст, ки ҳамеша бо огоҳии нав ва эҳсоси тозагии табиат аз фасли баҳор оғоз меёбад.
Дар фарҷоми чорабинии қайд карда шуд, ки бо кӯшишҳои муштарак анъанаву расму оинҳои мардумиро эҳё намуда, онро бо муҳаббат ба наслҳои оянда интиқол медиҳем.